آرمی چیف کی کاوشوں سے اربوں ڈالرزکی بیرونی سرمایہ کاری نے پاکستان کا رخ کرلیا
لاہور:پاکستان علما کونسل کے زیر اہتمام ملک بھر میں یوم یکجہتی فلسطین منایاگیا،اس دن کی مناسبت سے سیمیناراور کانفرنسز کا انعقاد کیا گیا ۔ جامعہ منظورالاسلامیہ لاہورکینٹ میں منعقدہ سیمینارسے خطاب کرتے ہوئے وزیر اعظم کے نمائندہ خصوصی و پاکستان علما کونسل کے چیئرمین حافظ طاہر محمود اشرفی نے کہا کہ پاکستان نے اقوام متحدہ سے مطالبہ کیاہے کہ غزہ پر اسرائیلی جارحیت اورجنگی جرائم کی تحقیقات کیلئے ٹربیونل بنایاجائے جس کی سفارشات کی روشنی میں اسرائیلی حکام کے خلاف کارروائی کی جاسکے۔ ان کاکہناتھاکہ ہم اسرائیل کوقابض،غاصب اور ظالم سمجھتے ہیں، ہمارے اس اصولی موقف میں کبھی کوئی تبدیلی نہیں آئی اور نہ ہی آئے گی، ہماری کوشش ہے کہ غزہ پرمستقل جنگ بندی ہونی چاہیے جبکہ اس سلسلے میں حکومت پاکستان کے عالمی سطح پر اوپن اور بیک ڈور رابطے جاری ہیں۔انہوں نے کہا کہ آرمی چیف اور نگران حکومت کی کاوشوں سے اربوں ڈالرزکی بیرونی سرمایہ کاری نے پاکستان کا رخ کرلیا ہے، آنے والے دنوں میں قوم کو مزید خوشخبریاں ملیں گی۔حافظ طاہر محمود اشرفی کامزید کہناتھاکہ آج پوری دنیا میں یوم یکجہتی فلسطین منایاجارہاہے، اسرائیلی بربریت پوری دنیا کے سامنے عیاں ہیں، صرف اسلامی ممالک نہیں بلکہ مغربی ممالک کے عوام بھی اسرائیلی جارحیت کے خلاف آوازاٹھا رہے ہیں۔طاہر اشرفی نے کہا کہ اوآئی سی،سعودی عرب،پاکستان سمیت دیگر ممالک کے دبائو کی وجہ سے غزہ میں جنگ بندی اور قیدیوں کی رہائی عمل میں آئی جس میں دو دن کا اضافہ کیاگیا، اب ہماری کوشش اورخواہش ہے کہ یہ عارضی جنگ بندی مستقل ہونی چاہیے تاکہ غزہ میں امدادی سرگرمیاں تیز کی جاسکیں ۔انہوں نے کہاکہ ہمارے موقف کی آج پوری دنیا نے تائید کی اور یہی مطالبہ سامنے آرہاہے کہ غزہ پر اسرائیلی بربریت پر ٹربیونل بننا چاہیے۔ انہوں نے کہاکہ فلسطینی سفیر سے کورہیڈکوارٹرز میں آرمی چیف کی ملاقات،کورکمانڈرکانفرنس میں فلسطینی عوام سے یکجہتی کا اظہار پاکستان کے اصولی موقف کی عکاسی کرتا ہے اور ہمارا مطالبہ آزاد، خودمختارفلسطینی ریاست کا قیام ہے جس کا دارالخلافہ القدس ہوگا۔
