شمالی وزیرستان: سیاسی اجتماع کو نشانہ بنانےکی کوشش ناکام، سیکیورٹی اہلکاروں سمیت 4 افراد شہید

راولپنڈی:شمالی وزیرستان کے ضلع دتہ خیل میں سکیورٹی فورسز نے دہشت گردوں کی جانب سے سیاسی اجتماع کو نشانہ بنانےکی کوشش ناکام بنا دی، خودکش حملے میں سکیورٹی اہلکاروں سمیت 4 افراد شہید ہوگئے۔آئی ایس پی آر کے مطابق خودکش حملہ آور کا ارادہ ایک عوامی اجتماع کو نشانہ بنانا تھا لیکن سکیورٹی فورسز کے اہلکاروں کی جانب سے فوری جوابی کارروائی نے ایک بڑی تباہی کو روک دیا کیونکہ فوجیوں نے فوری طور پر خودکش حملہ آور کی گاڑی کو شک کی بنیاد پر روک لیا اور متعدد معصوم جانوں کو بچانے کے لیے اپنی جانوں کا نذرانہ پیش کیا۔خودکش حملے میں نائیک سید اللہ شاہ (عمر 33 سال، رہائشی چارسدہ) ،سپاہی جواد خان (عمر 31 سال، ساکن ضلع ہری پور)، خیبرپختونخوا پولیس ڈیپارٹمنٹ کے پولیس کانسٹیبل حکیم جان (ضلع شمالی وزیرستان کا رہائشی) اور ایک معصوم شہری شہید ہوئے۔آئی ایس پی آر کا کہنا ہے کہ پاکستان کی سکیورٹی فورسز اور قانون نافذ کرنے والے ادارے دہشت گردی کی لعنت کو ختم کرنے کے لیے پرعزم ہیں اور ہمارے بہادر فوجیوں اور معصوم شہریوں کی ایسی قربانیاں ہمارے عزم کو مزید تقویت دیتی ہیں۔