وزارت دفاع کا پاکستان ایکس سروس مین سوسائٹی اور ویٹرنز آف پاکستان سے لاتعلقی کا اعلان

اسلام آباد: وزارت دفاع نے سابق فوجیوں کی تنظیموں سے لاتعلقی کا اظہار کرتے ہوئے وضاحت کی ہے کہ پاکستان ایکس سروس مین سوسائٹی اور ویٹرنز آف پاکستان سمیت دیگر غیر رجسٹرڈ تنظیموں کا پاک فوج کے ساتھ کوئی تعلق نہیں ہے اور نہ انہیں کام کرنے کی اجازت دی گئی ہے۔وزارت دفاع کی جانب سے جاری اعلامیے کے مطابق پاکستان ایکس سروس مین سوسائٹی اور ویٹرنز آف پاکستان کو تسلیم نہیں کرتے، سابق فوجیوں کی سوسائٹی کی دعویدار ایسی انجمنوں کی سرگرمیوں کی توثیق نہیں کرتے۔وزارت دفاع کا کہنا ہے کہ یہ انجمنیں خیراتی مقاصد، سیلاب زدگان کی امداد کیلئے فنڈز کی درخواست کرتی ہیں، یہ انجمنیں عوامی خدمات یا اپنے خیالات کی ترویج کیلئے حمایت کی درخواست کرتی ہیں، ایسی نام نہاد سابق فوجیوں کی سوسائٹیاں مسلح افواج سے وابستگی کاغیر قانونی دعویٰ کرتی ہیں۔وزارت دفاع کے مطابق ایسی سوسائٹیوں کو نہ تو تسلیم کیا گیا نہ ہی اس کی اجازت ہے، سابق فوجیوں کی سوسائٹیوں کے کام کرنےکی جامع پالیسی رہنما اصول مرتب کرچکے ہیں لہٰذا پالیسی کے رہنما اصولوں کی تعمیل نہ کرنےوالے افراد کی کوئی بھی تنظیم مجرم ہوگی۔وزارت دفاع کا کہنا ہے کہ ایسی تنظیم کو تعزیری نتائج کا سامنا کرنا پڑے گا۔