ضلع خیبر کے قبائل نے ہر مشکل گھڑی میں حکومت کا ساتھ دیا،شاہد آفریدی

پشاور:پاکستان کرکٹ ٹیم کے سابق کپتان شاہد آفریدی کہا ہے کہ تعلیم کے بغیر کوئی قوم ترقی نہیں کرسکتی بالخصوص بچیوں کی تعلیم کے بغیر معاشرے کی تعمیر ممکن نہیں۔کورونا وائرس کے مرض سے صحت یاب ہونے کے بعد پاکستان کرکٹ ٹیم کے سابق کپتان شاہد خان آفریدی دوبارہ میدان عمل میں آگئے، انہوں نے اپنے آبائی علاقہ بوٹان شریف وادی تیراہ ضلع خیبر کا دورہ کیا اور ایک ہزار مستحق افراد میں شاہد آفریدی فاؤنڈیشن کی جانب سے امدادی راشن تقسیم کیا۔انہوں نے کہا کہ خیبر کے لوگوں نے نامساعد حالات کا ڈٹ کر مقابلہ کیا اور قبائل نے دہشت گردی کا مردانہ وار مقابلہ کیا۔ وادی تیراہ بہت حسین ہے۔سابق کپتان نے کہا کہ حکومت ضلع خیبر کے لوگوں کو سہولیات فراہم کرے کیونکہ ضلع خیبر کے قبائل نے ہر مشکل گھڑی میں حکومت کا ساتھ دیا۔مجھے امید ہے کہ عوام اس بار بھی اپنی روایت قائم رکھتے ہوئے بہت حوصلے اور ہمت سےعالمی وبا کا مقابلہ کریں گے۔ انہوں نے خیبر کے عوام پر زور دیا کہ وہ کورونا وائرس کا پھیلاؤ روکنے کے لیے محکمہ صحت اور حکومت کی جانب سے دی گئی ہدایات پر سختی سے عمل کریں۔شاہد خان آفریدی نے کہا کہ ہمیں آگے بڑھ کر ملک کی ترقی کے لیے انتھک محنت کرنی ہوگی تاکہ ہماری بدولت ملک کا نام روشن ہو، قبائل میں رائج جرگہ نظام ذاتی مفادات کے بجائے قومی ترجیحات پر توجہ دے تاکہ عام آدمی تک اس کے ثمرات پہنچ سکیں۔تعلیم کی اہمیت اجاگر کرتے ہوئے سابق کپتان کا کہنا تھا کہ تعلیم کے حصول کے بغیر کوئی قوم ترقی نہیں کرسکتی خصوصاً بچیوں کی تعلیم کے بغیر معاشرے کی تعمیر ممکن نہیں، فاٹا انضمام کے بعد موجودہ حکومت ترجیحی بنیادوں پر تعلیم اور صحت کے شعبوں میں کام کرے تاکہ یہاں کے عوام کو ریلیف ملے۔