عمران خان نے غیر ملکی فنڈنگ کیس میں مسلسل جھوٹ بولا ،انجینئر امیر مقام
اسلام آباد:وزیراعظم کے مشیر برائے قومی تاریخ وثقافت ڈویژن انجینئر امیر مقام نے کہا ہے کہ عمران خان اپنا موازنہ سابق وزیراعظم نواز شریف سے نہیں کر سکتے ،میاں محمد نواز شریف کھوکھلے نعروں پر نہیں عملی کام پر یقین رکھتے ہیں ، وزیر اعظم شہباز شریف ملک کی ترقی اور خوشحالی کے لیے کوشاں ہیں اور ملک میں معاشی استحکام لانا حکومت کی اولین ترجیح ہے۔ ان خیالات کا اظہار انہوں نے پاکستان کے 75 ویں یوم آزادی ڈائمنڈ جوبلی کی تقریبات کے سلسلے میں لوک ورثہ میں تین روزہ ثقافتی میلے کا افتتاح کرتے ہوئے کیا۔ اس موقع پر خطاب کرتے ہوئے وزیر اعظم کے مشیر نے کہا کہ اس شاندار ثقافتی تقریب کا حصہ بننا اعزاز کی بات ہے۔ انہوں نے فنکاروں کو خوش آمدید کہتے ہوئے پوری قوم کو پاکستان کے 75ویں یوم آزادی کی مبارکباد دی۔ لوک ورثہ کے کردار کو سراہتے ہوئے انہوں نے کہا کہ قومی ادارہ برائے لوک اور روایتی ورثہ (لوک ورثہ) کی جانب سے تاریخی اور ثقافتی ورثے کے فروغ کے لیے آزاد جموں کشمیر اور گلگت بلتستان سمیت تمام صوبوں کے فنکاروں کو مدعو کرنا ایک عظیم خدمت ہے۔امیر مقام نے نیشنل آرکائیوز آف پاکستان کی جانب سے پنڈال میں آویزاں تاریخی اور نایاب تصاویر کی تعریف کی اور کہا کہ یہ ہماری اجتماعی ذمہ داری ہے کہ ہم اپنے ہیروز کی قربانیوں کو خراج تحسین پیش کریں۔ انہوں نے کہا کہ ہم سب کو سوچنا چاہیے اور اپنے ملک کی بہتری کے لیے اپنا کردار ادا کرنا چاہیے۔ انجینئر امیر مقام نے پی ٹی آئی کے سربراہ پر تنقید کرتے ہوئے کہا کہ عمران خان اپنا موازنہ سابق وزیراعظم نواز شریف سے نہیں کر سکتے جنہوں نے اس ملک کو ایٹمی طاقت بنایا اور ملک کا دفاع مضبوط کیا۔ انہوں نے کہا کہ میاں محمد نواز شریف کھوکھلے نعروں پر نہیں عملی کام پر یقین رکھتے ہیں اسی لیے پوری قوم کو ان پر فخر ہے جنہوں نے ملکی ترقی میں اپنا کردار ادا کیا۔ انہوں نے کہا کہ وزیر اعظم شہباز شریف بھی ملک کی ترقی اور خوشحالی کے لیے کوشاں ہیں، حکومت کے عملی اقدامات کے نتیجے میں ڈالر کی قدر میں کمی آئی ہے۔ ملک میں معاشی استحکام لانا حکومت کی اولین ترجیح ہے۔ امیر مقام نے کہا کہ پی ٹی آئی کی حکومت نے معیشت کو تباہ کر دیا، عمران خان نے غیر ملکی فنڈنگ کیس پر مسلسل جھوٹ بول کر قوم کو گمراہ کرنے کی کوشش کی جس نے دشمنوں کے ممالک سے پیسے بھی وصول کئے۔ انہوں نے کہا کہ پی ٹی آئی کے سربراہ ملک میں تقسیم پیدا کرنا چاہتے ہیں۔ وزیراعظم کے مشیر نے کہا کہ ن لیگ نے ان عناصر کو شکست دی ہے جو ملک میں بدامنی پھیلانے کی کوشش کر رہے تھے۔ اب ایسی تمام کوششیں ناکام بنا دی گئی ہیں۔ ملک میں سیلاب کی صورتحال پر بات کرتے ہوئے وزیراعظم کے مشیر نے کہا کہ وزیراعظم شہباز شریف کی قیادت میں حکومت سیلاب زدہ علاقوں میں سیلاب متاثرین کو زیادہ سے زیادہ سہولتیں فراہم کرنے کے لیے سیلاب سے متعلق امدادی سرگرمیوں میں مصروف ہے۔
