وزیرستان سے تعلق رکھنے والے مارشل آرٹ کے ماہر عرفان محسود نے 38 واں گنیز ورلڈ ریکارڈ اپنے نام کر لیا

پشاور: خیبر پختونخوا کے ضلع جنوبی وزیرستان سے تعلق رکھنے والے عالمی ریکارڈ یافتہ مارشل آرٹ کے ماہر عرفان محسود نے 38 واں گنیز ورلڈ ریکارڈ اپنے نام کر لیا۔ورلڈ ریکارڈ ہولڈر عرفان محسود نے اسٹار جمپس کا سب سے مشکل ورلڈ ریکارڈ بنایا، انہوں نے 60 پاؤنڈ وزن کے ساتھ ایک منٹ میں 27 اسٹار جمپس کیے۔عرفان محسود کی جانب سے توڑا جانے والا یہ ورلڈ ریکارڈ اس سے قبل 22 اسٹار جمپس کا تھا۔عرفان محسود کو گنیز ورلڈ ریکارڈز انتظامیہ نے تصدیقی ای میل جاری کردی ہے۔خیال رہے کہ عرفان محسود سب سے زیادہ پش اپس کے ریکارڈ بنانے والے دنیا کے واحد کھلاڑی ہیں۔ انہوں نے بھارت، امریکا، عراق، برطانیہ، فلیپائن اور اٹلی کے ریکارڈز بھی توڑے ہیں۔