پاکستان سائنس ایکسپو سے بین الاقوامی سطح پر ملک کا مثبت پیغام جائے گا، سینیٹر شبلی فراز

اسلام آباد:وفاقی وزیر سائنس و ٹیکنالوجی سینیٹر شبلی فراز نے پاکستان سائنس ایکسپو کو ایک بڑا ایونٹ قرار دیتے ہوئے کہا ہے کہ ایکسپو کے انعقاد سے بین الاقوامی سطح پر پاکستان کا مثبت پیغام جائے گا۔یہاں ذرائع ابلاغ کے نمائندوں سے گفتگو کرتے ہوئے انہوں نے کہا کہ سائنس کا انقلاب ہمارا مستقبل ہے اور پاکستان کے عوام کی خوشحالی ہماری اولین ترجیح ہے۔وزارت سائنس و ٹیکنالوجی کے ذیلی ادارے پاکستان سائنس فائونڈیشن کے زیر اہتمام پاکستان سائنس ایکسپو 28 اور 29 جنوری کو وفاقی دارالحکومت اسلام آباد میں ہوگی۔وفاقی وزیر نے کہا کہ پاکستان سائنس ایکسپو کے 80 فیصد سے زائد سٹالز پہلے ہی بک ہوچکے ہیں۔ پاک چائنا فرینڈشپ سینٹر میں ہونے والی ایکسپو میں قومی اور غیر ملکی شخصیات، اراکین پارلیمنٹ، سرکاری افسران، نجی کمپنیوں کے ایگزیکٹوز اور سی ای اوز، مختلف شعبوں سے تعلق رکھنے والی اہم شخصیات، صنعتی رہنما، سکولوں، کالجوں اور یونیورسٹیوں کے طلبہ، سکالرز، محققین اور سائنسدان شریک ہوں گے۔پاکستان سائنس فائونڈیشن کے چیئرمین پروفیسر ڈاکٹر شاہد محمود بیگ ایکسپو کو کامیاب بنانے کے لئے انتظامات کو حتمی شکل دے رہے ہیں۔ پاکستان سائنس ایکسپو ملک کی تاریخ میں اپنی نوعیت کی پہلی ایکسپو ہے جس کا مقصد پاکستانی سائنسدانوں، انجینئرز، سائنس سوسائٹیوں، طلبہ، یونیورسٹیوں اور محققین کی کامیابیوں کو ظاہر کرنا ہے، اس کا انعقاد حکومت، صنعت اور تعلیمی اداروں کے درمیان اشتراک کے لیے کیا جارہا ہے۔ ایکسپو مختلف اداروں اور تنظیموں کو سائنس و ٹیکنالوجی کے میدان میں کامیابیوں کو پیش کرنے کا پلیٹ فارم فراہم کرے گی۔

Spread the love