اٹک: مسافروں سے بھری بس کھائی میں جا گری، 12 افراد جاں بحق، متعدد زخمی

اٹک:برہان انٹر چینج کے قریب افسوسناک واقعہ، گاڑی کو بچاتے ہوئے مسافروں سے بھری بس کھائی میں جا گری، درجنوں افراد جاں بحق، متعدد زخمی۔ تفصیلات کے مطابق لاہور سے مردان جانے والی مسافر بس برہان انٹر چینج کے قریب موٹر وے پر کار کو بچاتے ہوئے تیز رفتاری کے باعث گہری کھائی میں گرگئی۔اطلاع ملتے ہی موٹر وے پولیس اور امدادی ادارے موقع پر پہنچ گئے اور بد قسمت بس میں موجود زخمیوں اور جاں بحق افراد کو ٹی ایچ کیو حسن ابدال پہنچایا۔ابتدائی اطلاعات کے مطابق حادثے میں 5 ماہ کے بچے اور خاتون سمیت 12 افراد جاں بحق ہوگئے جبکہ متعدد افراد کو شدید زخمی حالت میں راولپنڈی روانہ کردیا گیا۔ہسپتال ذرائع کے مطابق 35 سے زائد زخمی افراد کی حالت بھی نازک ہے۔ جن جاں بحق افراد کی شناخت ہوئی ان میں اشفاق علی ساکن مردان، سلیمان ساکن مردان، وقاص ساکن مردان، کامران ساکن صوابی، محمد رؤف ساکن صوابی، 32 سالہ خاتون حمیدہ ساکن مردان، 5 ماہ کی بچی خدیجہ ساکن صوابی، ہارون ساکن چارسدہ شامل ہیں جب کہ جاں بحق تین افراد کی شناخت کا عمل جاری ہے۔